Die Ilse iss drotz ihrer 63 Johr a werglich scheena Fraa – und damit dess nuch lang so blabbd, heechd’sa und bfleechd’sa sich mit ollerlei geheima Säfdla und Greems, gedd reglmeeßich ineran Kosmedigg-Salon, zur Fußbfleechera und zum Frisör. Obber ausgerechnd die Friseesa hot der Ilse kerzlich woss gsochd, do iss‘sa drotz ihrer reichlichn Schminke im Gsichd keesweiß worrn. „Ihra Hoor woan doch frieher immer biggobello, obber etzerd gfalln’sa mir fei net“, hot’sa die Ilse gewarnd, „die gänga immer merra aus – dess kimmd wohrscheins von die Wechsljohr.“ Und dann hot’sa an Satz gsochd, wo die Ilse gedachd hot, ihr werrd in den Momend dess Bluud abgelossn. „Wenn dess so weider gedd, grieng’Sa a Glatzn.“
