Der Peter Henlein hot sellmoll im 15. Johrhunnerd in Nermberch die Daschnuhr erfunna, der Martin Behaim na Globus, der Grundig schbeeder na Radio, im oberfränkischn Buttenheim hot der Levi Strauss zern erschdn Moll "Jeans" neha lossn - und karz draaf iss an fränkischn Koch a "Schäuferla" gelunga. In der Hofer Geengd hot'mer die Rindfleischwarschd endeggd - und kerzlich sogoa a Brodwarschd mit Schoggo-Aroma. Die gressda Erfindung hot obber letzda Wochn mei Nachber Heinz gemachd - den sei Idee ko fei die ganza Energie-Wende revoluzioniern: Er hot amds auf seiner Derrassn am Grill - etzerd hold dich fessd! - vier Schdiggla Rinderfilee in Brigedds verwandld. Die Umwandlung von Fleisch in Heizmadderiol hot kana 30 Minuddn gedauerd - der Heinz hot zu derra genioln Idee net amoll a Maschina oder annera dechnischa Hilfsmiddl gebrauchd. Dess aanzicha Werkzeich woa sei Grillzanga, wall'er die urschbringlichn Fleisch-Schdiggla mehrfach wendn mussd, sinsd häddn die Brigedds net endschdeh kenna. Wie der Heinz zum Schluss dess kullschwarza Heiz-Madderiol aufm Deller bräsendierd hot, hamm rundrum olla begeisderd Beifoll gegladdschd. "Dei Erfindung", hot na Heinz sei Bruder gsochd, "iss a echda Sensazion. Mit derra Umwandlung von Fleisch in Brigedds gedd neemlich a welldweida Wunsch der Menschheid in Erfillung: Mir kumma endlich vom Heizeel weg". Do siggsd moll widder: Fir a Johrhunnderd-Idee brauchsd fei net immer an Haufm Brofessorn und a deiersch Forschungslabor - manchsmoll langa a boa Schdiggla Fleisch, a Grill und a Indelligenz-Bolzn wie der Heinz, um fir die Energiewende a ganz neia Meddoodn zer endeggn...
