Jeds Gschöpf auf unnera Welt hot san Sinn und sei Aufgoob. Die Webbsn sänn erschaffn worrn, damit'sa uns Menschn im Hochsommer dess Leem aweng schwer machn. Ban Kaffeegränzla auf der Derrassn oder ban Grilln im Gaddn kumma'sa massnweis dazu, hoggn sich auf na Kuhng, auf die resch gebroodna Wamma oder aufs Mammaladnbrod nauf - und iberbriefn im himmlischn Aufdrooch, ob die Menschn huntn auf der Erdn werglich ausreichnd Dolleranz gelernt hamm oder sofodd undiszibliniert mit Händ und Fieß in der Luft rumfuchtln. "Jedes Lebewesen hat seine Daseinsberechtigung", socht immer der Hermann, der woss na "Insektenschutzbund" erscht letzta Wochn widder 25 Euro schbendiert hot, "auch die Wespen verdienen unsere Zuneigung. Denn sie folgen lediglich ihrem natürlichen Überlebenswillen: Sie brauchen den Zucker quasi als Treibstoff, sonst verenden sie."