Mei Nachber Franz hot jednfolls letzda Wochn in san Hitze-Dilirium nachds vom Graf Dracula gedraamd - und am näggsdn Dooch hot'er sich dess Fachbuch "Faszination Fledermaus" kaafd. Wie mir zwa in oller Herrgoddsfrieh am Gaddnzaun aweng mitnanner gewaafd hamm, hot mir der Franz sofodd die neia wissnschafdlicha Erkenndnis aus san schlaua Biichla verrodn: "Es gibd fei in Panama im Dschungl Fledermais, die wossn ban Flieng ihr Maul net gschlossn hamm wie bei uns, sondern schberr-angl-weid aufschberrn." Und dann hot'er mich gfrochd: "Woss soggsd dä du dazu?" Wenn ich ehrlich bin, iss mir eingdlich warschd, ob a Fledermaus mit gschlossna oder offna Maul rum fliechd, obber ich wolld man Nachber net verletzn, wall'er doch nix dafir ko, wenn sei Hirn weecher der dauerndn Hitz aweng aufgewaachd iss. Obber der Franz hot auf sei Schilderung gleich nuch aans draaf gsetzd. "Etzerd fährd a deitscha Biologin niiber in den Rengwald und schdudierd die Blattnasen-Fledermais, damit die Wissenschafd endlich raus finnd, warum die Vampire ban Rumfladdern ihr Maul aufreißn", hot der Franz gschdrohld. Es ko fei saa, dass sich der Glimawandl und die Hitz net bloß aufn Franz sei Hirn auswirkd, sondern aa auf die Fledermais in Panama - und sogor auf a boor Biologie-Brofessorn in Deitschland ... Gerch
