Obber etzerd hot a Meinungsumfrooch ergeem, dass die Leit in Bayern aferamoll nimmer so zerfriedn sänn wie frieher. "Abgenommen hat der Umfrage zufolge vor allem die Zufriedenheit mit dem Arbeitsplatz und den persönlichen Finanzen", hamm die Wissnschafdler raus gfunna - und mei Schdammdisch-Bruder Edwin hot dess Ergebnis sofodd beschdädichd. "Mir gedd die Ärberd in der Firma aa schwer aufn Wegger", hot’er gsochd. Bsondersch der Mondooch machd na Edwin zer schaffn, wall’er doch am Sonndooch amds die Wochn immer mit achd Kapuziner-Waazn aweng ausglinga lässd. "Dann kumm ich zer frieh kaum ausn Bedd raus", schilderd’er sei Unzufriednheid mit der Ärberd.
