Der Dieter und der Helmut sänn zwoa scho Rentner, obber ols Hobby-Rodfohrer holdn'sa sich fidd - und wenn'sa dann verschwitzd vom Reedla abschdeing, schmeggd ihna dess Bier sowieso am ollerbessdn. Kerzlich sänn die zwa weißhooringa Mannsbilder ban "Lamilux Classics, dem größten Radsportevent der Region" dabei gewesn - ollerdings net im Saddl, sondern ols freiwillicha Helfer bei der Organisazion. An ana braadn Schdraßn-Greizung nahe der tschechischn Grenz mussdn'sa jeder miteran Fähnla in der Händ immer winkn, damit die Lamilux-Rodfohrer net nooch rechds abbieng, sondern nooch links. Wennsd maansd, dass dess a einfacha Aufgob iss, dann daischsd dich! Der Dieter und sei Freind Helmut sänn jednfolls schwer ins Schwitzn kumma, wall doch zwischn denner villn Renn- und Hobbyfohrer von der "Lamilux-Classics" immer aa Audos und normola Rodfohrer underwegs woan, die wossn bloß aweng an Sonndoochs-Ausflug gemachd hamm. Dessweecher hot sich der Dieter vorsichdsholber scho zehn Meder vor derra Weggabelung middn auf der Schdraßn bossdierd, hot min Fähnla rum gfuchdld und seina Einweisunga geblääkd, um bei denner haufm Reedlafohrer und Audos a gewissa Vorsordierung zer machn - und der Helmut hot dann middn auf der Greizung jedn in die linka oder rechda Schdraßn nei gewunkn.
