Der auferschdandna Kader

Kerzlich hot der Wolfgang fir seina zwa Gunger an Kader ausn Dierheim hammgebrachd – an schenn Kerl miteran gelb-braun gschdraafdn Fell wie beieran echdn Diecher. Dessweecher hamm die Gunger sofodd endschiedn: „Den haaß’mer ‚Diecher‘ – genauso wie’er ausschaud!“

Der „Diecher“ hot net bloß mit die zwa Gunger a scheens Leem k’habd, sondern wor gleich der Liebling von der ganzn Familie. Er iss in der Nachberschafd rum schdrawanzd und jedn Weibla hinderher gschlitzd, damit die Katzn net ausschderm. Ab und zu hot er aa zum grußn Ärcher von die Nachbern an denner ihr Hausdir no gsaachd – und ansonsdn hot er vill gschloofn. Jednfolls wor na „Diecher“ sei Welld subber in Ordnung – bis aneran Samsdooch zer frieh die zwa Gunger in die Kichn rei gewerchd sänn und gebeegd hamm: „Unnern ‚Diecher‘ hot a Audo iberfohrn – der liechd draußn dood auf der Schdraßn.“ Olla sänn sofodd naus gewerchd und hamm dess Ungligg gsehng: Der arma Kader mit san gelb-brauna Fell wor dood inera Bluudlachn geleeng.

Die Gunga hamm Rotz zer Wasser gegrinna, und der Vadder hot endschiedn: „Unner ‚Diecher‘ werrd ganz wirdich in unnern Gaddn beerdichd“. So hamm‘sas dann aa gmachd. Die Gunger hamm zer derra Zeremonie sogoa ihra Freind eigeloodn, die Nachbern sänn kumma – es woa fei wie bei ana richdinga Leich. Wie dann dess glana Grab min doodn Kader widder mit Erdn zugedeggd woa, hot der Vadder an Flachmann aus der Husndaschn raus k’hulld und mit die Nachbern a Schnäbbsla nei gezwiddscherd – do heerd’mer aferamoll a Maunzn, und ausn Himbeern-Busch kimmd mit hoch aufgschdelldn Schwanz der leibhafdicha „Diecher“ raus schdolzierd. „Ja legg mich doch gleich am Oasch“, hot der Wolfgang vor sich hiegebrammld, „ich glaab, ich verdrooch kan Schnabbs mehr - etzerd sieh ich scho Gschbensder!“ Obber dann wor die Freid iber die „Wiederauferstehung“ vom „Diecher“ riesich – ollerdings iss bis heid a Rädsl, weller gelb-braun gschdraafda Katz feierlich im Gaddn beerdichd worrn iss …Gerch