Der Roland ärberd seid 27 Johr ineran grußn Audo-Haus – und erledichd jedn Dooch achd Schdundn lang hunnerdbrozendich genau olles dess, woss‘er ols orndlicher „kaufmännischer Sachbearbeiter“ machn muss. Obber nooch Feieramd und am Wochnend verwandld sich der Bleibschdifd-Schbitzer Roland dahamm zeran Hobby-Heimwerker von Goddes Gnadn. Wenn neemlich im Haus erchetz a Rebbaradur fällich iss, schleechd der Roland sofodd dess Buch „Papa macht alles selber – ein Ratgeber für Hobby-Handwerker“ auf – und dann gedd’s los: Er schraubd und hobld, er hämmerd und fliesd, er noogld und schreinerd, dass die Wänd waggln! Dess Ergebnis vom Roland seina Ärberd iss ollerdings net immer im Sinn von seiner Fraa – die moserd dauernd an ihrn Oldn rum, wall’er angeblich zehn Dauma hot. Ofd muss‘sa hinderher sogor fachkundicha Handwerker kumma lossn, die wossn na Roland sei Rebbaradur rebbariern. So woasch aa letzda Wochn während derra beriehmdn „4-Schanzen-Tournee“.