Neber der Fußgänger-Ambl an der Hofer Marienschdraßn woan drei Rendner aferan Bänkla gsessn und hamm aweng iber Godd und die Welld simbulierd. „Unnera Kinner schaua Dooch und Nachd bloß nuch in ihr Händy nei“, hot der old Mo in der Middn gejammerd – und sei Freind neemdro hot gleich geniggd. „Wen wunnerd’s“, hot’er gsochd, „dass die beriehmda PISA-Schdudie ergeem hot, dass die gunga Leit in Deitschland immer bleeder werrn.“ In den Momend iss vor die drei Rendner die 16-jähricha Leonie erschiena und wolld schnell die Schdraßn iberquern, obber die Ambl woa auf Rod. Dess Maadla iss also schdehgebliem und hot aweng in ihrer umk’hängdn Daschn rumgegroomd – do iss ihr bletzlich a Zehn-Euro-Schein ausn Däschla rausgfalln und schee langsam wie in Zeidluubm zer Bodn gsegld. Die Leonie hot zwoa nuch schnell in der Lufd hinderher gegrabschd, obber sie hot den Schein net derwischd – der iss vor ihra Aang rogfladderd und ineran Gulli verschwundn. Die oldn Männer aufm Bänkla hamm aweng gegrinsd, obber dess Lachn iss ihna fei gleich widder verganga.