Der Hans lebbd mit seiner Hermine ineran
Derfla, wo heier an Ostern gleich siem Gunga und Maadla Konfirmazion k’habd hamm - und jedn hot der Hans heggsdberseenlich a Kuveer mitera schenn Gliggwunsch-Kaddn samsd an 20-Euro-Schein ibergeem. Die Gschenker hamm dann ab Griindonnersdooch zu ana grußn Dank-Aggzion gfiehrd: Noocherernanner hamm die siem Konfirmandn an der Hausdiir geglinglt und siem
Bäggla abgeem - in jedn woa drinna: a mordsdrumm Schdreisla-Kuhng, a Goggos-Kuhng, a Quarg-Kuhng mit Schoggo-Glasur und a Oster-Zobf. "Ach Gooodla", hot die Hermine die Gfohr sofodd geahnd, "wer soll dä dess haufm Zeich essn?" Jednfolls hot’sa scho’moll na Obba aweng vorgewarnd, der woss droom im erschdn Schdogg wohnd - und wie frieher die Haus-Sau ban Ressdla-Essn immer mithelfn muss, wenn die Hermine widder moll zer vill gekochd hot. So hamm sich der Hans, sei Olda und der Obba iber Ostern gemeinsom darch den haufm Kuhng geärberd.
