Dambf abgelossn im Zuuch

Der Herberd iss zwoa scho 37 Johr old, obber er lebbd immer nuch wie frieher ols holbschdarker Panker: Aufm Kobf hot’er san Irokesn-Hoorschnidd griin gfärbd, in der Nosn hängd a Schlisslbund, im rechdn Ohrläbbla schdeggn iberernanner vier silberna Ringla - und olla zwa Arm sänn bis ro zern Handgelenk mit geheimnisvulla chinesischa Schrifdzeing farbich däddowierd. Na Herberd sei gressda Freid iss neber aweng Häffi-Meddl-Musigg sei Hund, a englischa Bulldoggn. Der Hund und sei Herrla bassn schee zamm: Der Herberd iss brasslderr und schaud aus wie vom annern Schdern - und sei Bulldoggn schdedd iberfressn wie a digga Walzn auf vier karza Schdambfer, ausn zammgedriggdn Kobf hängd vorn ausn gschlossna Maul a glana roda Zunga raus.

Letzda Wochn hot der Herberd san feddn "Nero" a gruß Ereignis ogekindichd. "Mir zwa fohrn min Zuuch nooch Nermberch und widder zerrigg", hot’er gsochd, "und zwoa in der erschdn Glass! Den Luxus leisd’mer uns!" Der Hund hot sei Herrla dreiherzich ogschaud, obber er hot dabei net na Eindruck gemachd, dass‘er die frehlicha Bodschafd verschdandn hot - min Schwanz ko der "Nero" sowieso net wedln, wall’er kan hot.

Am Hofer Bohnhof iss also der Herberd mit seiner Bulldoggn aufm Arm in den schenn Zuuch nooch Nermberch eigschdieng. Er hot die Diir vom Erschda-Glasse-Abdaal aufgemachd - drinna woan vier äldera Leit gsessn, denner woss ban Anbligg vom Herberd und san Hund gleich die Muffn aans zer hunnerddausnd ganga iss. Die dachdn, dass dess selldsoma Bäärla wohrscheins net wussd, dass die zweida Glass vill weider hindn woa. Obber kaner hot woss gsochd - und der Herberd hot sich aufn letzdn freia Blatz k’hoggd. Der "Nero" woa zerfriedn aufn Herrla san Schoß geleeng, iss mit raushängender Zunga gleich eigschloofn und hot weecher seina karzn Nosn foddner nooch Lufd gschnabbd. Obber net bloß mit der Lufd vorn am Kobf hot der Hund scheind’s aweng Schwierichkeidn k’habd, sondern aa mit der Lufd am annern End - jednfolls woa karz nooch Oberkotza aferamoll a Difdla im Abdaal, dass die Fohrgässd gleich min Daschn-
diichla und mit der Zeidung rumgewedld hamm. Die Oma am Fensder hot sogoa a Fläschla Kelnisch Wasser aus ihrn Handdäschla rausgegroomd und die greiz die quer aweng a frischs Aroma rumgschbritzd. Obber fimf Minuddn schbeeder hot der "Nero" scho widder Dambf abgelossn, und ab Marktredwitz hot sich der Hund iberhabsd nimmer under Kondrolln k’habd - er hot seina schwern Blähunga auf ihrn Weech darchn Ausbuff aa nuch mit endschbrechnda Geraischer rausschdreema lossn.

Im Abdaal woa etzerd in jeder Hinsichd digga Lufd! Die annern vier Leitla hamm na Herberd feindselich ins Visier genumma. "Machn’Sa fei aweng holblang", hot der ana Mo gschimbfd, obber der Herberd hot gleich abgewehrd. "Dess bin doch net iiiich", hot’er erglärd, "sondern dess iss mei ‚Nero’, der hot gesdern Amd an Kalbsgnochn grichd - do drabbd’s’na am näggsdn Dooch immer aweng die Ferzla naus." Mit derra Aufglärung woa den annern Mitfohrern net k’holfn - sie hamm weider a ziemlich beschwerlicha Fohrd bis Nermberch k’habd - und hamm noochn Ausschdeing am Bohnschdeich im wohrsdn Sinn vom Worrd "aufgeatmet" und drei Greizla gemachd, dass‘sa den Gifdgasangriff im Erschda-Glasse-Abdaal iberhabsd nuch iberlebbd hamm … Gerch