Mit seina 62 Johr iss der Erich nuch gud beinanner - der Schborrd häld’na jung.
Mit seina 62 Johr iss der Erich nuch gud beinanner - der Schborrd häld’na jung. Wenn’er bei gräffdinga Wind mit san Sörfbredd aufm Förmitzspeicher rumkurvd, reggn draußn am Ufer die Leit vuller Achdung ihra Kebf - und kaner glabbd, dass der eleganda Sörfer scho die driddn Zeh drinna hot.
Manchsmoll fährd der Erich ibersch Wochnend sogoa nunder zum Gardasee, wo die Sörfer massnweis rumkachln, wall do der Wind goa so schdarg bleesd. Obber ban letzdn Moll hot’s na Erich am Gardasee reglrechd zerrissn: Middn in san rasanndn Ridd iber die Welln iss aferamoll sei Sörfbredd darch die Lufd gewerbld, der Erich hot sich dreimoll iberschloong - und er hot an dermooßn archaischn Urschraa ausgschoßn, dass’na sei Broddeesn aus der Guschn rausgfloong iss. Wie dann der Erich ins Wasser neigebfladdschd woa, iss’er sofodd san Gebiss hinderhergedauchd, dess woss vor seina Aang langsam abgsunkn iss - und im ollerletzdn Momend hot’er die Beißerla werglich nuch mit der Händ derwischd und widder daddhie gschoom, wo’sa hie k’heern.
Dahamm in Hof woa der Schogg immer nuch dief gsessn. Dessweecher hot sich der Erich gleich so a neimodischa "Neopren-Tauchermütze" kaafd - und die hot’er dann jedsmoll aufgsetzd, wenn’er auf san gelibbdn Förmitzspeicher gsörfd hot. Aus derra enga Dauchermitzn hot’s na Erich zwoa seina Blatzbaggn rausgedriggd wie beieran Schbanferkl, obber der Underkiefer woa hold etzerd fessd fixierd, sodass’er sei Guschn nimmer aufmachn konnd - und dess Gebiss woa sicher!
Obber wie kerzlich amoll am Förmitzspeicher aa Windschdärke sechs woa und der Erich wie a Welldmassder iber die Welln gezischd iss, iss‘es widder bassierd: Na Erich hot wie sellmoll am Gardasee a Windschdoß gebaggd, er iss samsd Sörfbredd darch die Lufd gewerbld, hot san Ur-schraa gebläägd - und weg woa zern zweidn Moll sei Gebiss! Der Erich iss zwoa sofodd widder hinderher gedauchd, obber dessmoll woa olles fir die Katz: Seina Driddn sänn im Wasser verschwunden. Seitdem iss fei net ausgschlossn, dass kimfdich die Schwimmer im Förmitzspeicher voneran riesichn Karbfm oder Waller min Erich san Gebiss im Maul ogegriffn werrn … Gerch
—————
