Vor 500 Johr hot der beriehmda Hellseher Nostradamus brofezeid, dass amoll der Welldundergang karz bevorschdedd, wenn immer merra Leit wahnsinnich werrn. Und wemmer sich heitzerdooch aweng umschaud, nocherd muss mer soong: Es iss so weid! Die Zeichn von Wahnsinn, die woss der Nostradamus fir na Welldundergang ogekindichd hot, sänn jednfolls einwandfrei zer erkenna: Ineran Würzburger Weinberg leffd a Geiger rum und schbilld den Silvaner-Rebn Sinfonien vom Mozart, Bach und Beethovn vor, damit der Wein besser werrd; driim in Tachov hamm zwa tschechischa Bollizisdn a Dankschdell iberfalln und dess ganza Geld mitgenumma; in Hof iss a Mo am hellichdn Dooch schblidder-fooser-naggerd in der Altschadt rumgeloffn und hot sich anschließnd vor der Bollizei in der Marien-Kerng zwischn die grußn Heiligen-Figurn verschdeggd - und im italienischn Schdädtla Vimercate hot sich kerzlich a 40 Johr olda Fraa selber k’heierd. "Sie stand allein im weißen Brautkleid mit einem Rosenstrauß vor dem Standesbeamten, steckte sich den Ring selbst an den Finger und schwor sich ewige Treue", hot die Zeidung iber den Wahnsinn gschriem - und hot den endscheidendn Satz von derra Fraa werrdlich zidierd: "Ich, Laura Mesi, nehme mich selbst zur Frau." Mich leggsd am Oasch, hob ich mir gedachd, a Solo-Hochzich - etzerd iss fir unner Welld fei werglich "Maddäus am Letzdn"… Gerch
